"Ni lazima sasa kwa sisi madiwani kujiongeza kubuni vyanzo vipya vya mapato" amesema Makoga

Posted on: November 1st, 2018

Mwenyekiti wa halmashauri ya mji mafinga mh. Charles Makoga amewataka madiwani wa halmashauri ya mji mafinga kujiongeza kwa kutafuta wadau mbalimbali wa maendeleo na kuachana na tabia ya kutegemea bajeti ya halmashauri.

Ameyasema hayo wakati wa mkutano wa baraza la waheshimiwa madiwani la kipindi cha robo ya kwanza ya 2018/2019 uliofanyika leo  31 oktoba 2018 katika ukumbi wa halmashauri ulipo mafinga mjini, mkoani Iringa.

“Hata serikali yetu inajiongeza katika kutafuta wadau wa maendeleo Mfano mfano halmashauri ya mji wetu imeweka bajeti yake ya mapato ya ndani bilioni 3.2 lakini ni vigumu sana kupata kupata yote maana yake kama hatutaifikia basi miradi mingi haiwezi kutekelezwa”alisema mh. Makoga.

Mji wa mafinga una viwanda vingi na makampuni mengi kwa ujumla kunawadau wengi wa maendeleo wakiwemo wafanyabiashara na wako vizuri katika kuchangia maendeleo lakini hawawezi kuchangia kama hawafuatwi.

Halmashauri ina mpango mkakati wa kuhakikisha kunakuwa na wadau wengi kama vile shamba la miti sao hill ni moja kati ya wadau wakubwa wa halmashauri ambao huwa wanasaidia mara kwa mara kutoa greda la kusembua barabara mbalimbali za mitaa ya halmashauri ya mji mafinga

Sanjari na hilo amempongeza mbunge wa mafinga mjini mh. Cosato Chumi kwa jitihada zake za kutafuta wadau mbalimbali ambapo jana tu tayari amepata wadau watakaosaidia kumalizia ujenzi wa jengo la zahanati ya kijiji cha bumilayinga na kuwataka madiwani kuiga mfano huo kwa ajili ya kata zao ili kuondokana na dhana ya kutegemea bajeti ya halmashauri.

Kwa upande wao madiwani wa halmashauri hiyo wamepokea kwa pamoja ushauri huo na kuahidi kuufanyia kazi kwa maendeleo ya kata zao na Taifa kwa ujumla.

Diwani wa viti maalumu mh. Monica luvanda amesema “tumeupokea vizuri ushauri wa Mwenyekiti na tunaahidi kujiongeza kufanya kazi zaidi kama tulivyoshauriwa.

Kwa upande wake diwani wa kata ya sao hill mh. Denis kutemile amesema “wazo la mwenyekiti ni sahihi na la msingi sana na wala halikwepeki, hivyo ni wajibu wetu kuhakikisha tunawaletea wananchi wetu maendeleo kwa kujiongeza na kuachana na kasumba ya kutegemea bajeti ya halmashauri”.