Serikali Imegawa Pikipiki kwa Maafisa Elimu Kata.

Posted on: November 9th, 2018

Serikali kupitia Wizara ya Elimu Sayansi na Teknolojia na Wizara ya Ofisi ya Rais (TAMISEMI) imegawa pikipiki tisa aina ya honda kwa maafisa elimu kata (AEK) katika kata zote za halmashauri ya mji mafinga mkoani iringa.

Akizungumza mara baada ya kukabidhi pikipiki hizo Mwenyekiti wa halmashauri ya mji mafinga mh. Charles Makoga amesema pikipiki hizo zimefika kwa wakati muafaka ili kurahisisha usimamizi wa ubora wa elimu na kupunguza au kuondoa kabisa ziro katika shule zote za mji mafinga.

Aidha mh. Makoga ametoa wito kwa maafisa elimu kata (AEK) kuhakikisha wanazitunza na kusisitiza kwamba usafiri huo sio kwa ajili ya kufanyia biashara ya bodaboda bali zifanye kazi iliyokusudiwa.

Kwa upande wake mkurugenzi wa halmashauri ya mji mafinga bi. Saada S. Mwaruka amewapongeza maafisa hao kwa kusimamia vizuri shule za msingi hali iliyopelelekea halmashauri kushika nafasi ya saba kitaifa katika matokeo ya darasa la saba 2018 na nafasi ya kwanza ngazi ya mkoa wa iringa, amesisitiza juhudi ziongezwe zaidi ili kushika nafasi ya nne na hata ya kwanza sanjari na shule za sekondari bidii iongezwe.

Kwa upande wake afisa elimu msingi halmashauri ya mji mafinga bwana Kasmiri sambala amesema mapokezi ya pikipiki hizo yamekuwa ni faraja kubwa na zitasaidia kufanya ufuatiliaji mzuri wa elimu mashuleni.

Nae afisa elimu sekondari halmashauri ya mji mafinga bwana Voster Mgina ameeleza mpango mkakati wa kuhakikisha anaondoa ziro kwa shule za sekondari kupitia ujio wa usafiri huo kwani ni chachu kubwa ya kuondoa ziro kwa kuongeza ufuatiliaji zaidi mashuleni.

Akitoa shukrani za maafisa elimu kata wa halmashauri ya mji wa mafinga kwa serikali afisa elimu kata ya isalavanu bwana Mohamed Ilunga ameahidi kuzitumia pikipiki hizo vyema kwa malengo yaliyokusudiwa na pia ameomba kuongezewa mafunzo zaidi ya uendeshaji wa pikipiki hizo.

Mmoja wa maafisa elimu Kata bi. Eva mwanjisi ameishukuru serikali ya awamu ya tano kwa kuwawezesha usafiri ambao utakuwa chachu ya kufanya ufuatiliaji mara nyingi zaidi katika shule za mafinga

Afisa elimu kata ni moja kati ya kiungo muhimu katika ofisi ya elimu mji na shule za serikali katika ngazi ya kata ambae ndie mfuatiliaji mkubwa wa maendeleo ya elimu ndani ya kata.

Jumla ya pikipiki 2894 zilizogawiwa kote nchini zimegharimu kiasi cha tshs. bilioni 8 milioni 576 na elfu 72,000 na hiyo ni miongoni mwa hatua za serikali katika kuboresha elimu hapa nchini.